डहाणूमधील मुख्य पर्यटन आकर्षण म्हणजे डहाणू-बोर्डी किनारा. हा चिकू आणि अन्य फळांच्या बागांसाठी प्रसिद्ध आहे. उन्हाळ्यात देखील संपूर्ण किनाऱ्यावर थंडगार वारे वाहत असल्याने अनेक मुंबईकरांची वीकेंड सुट्टी या किनारी ठरलेलीच असते. हे हरित क्षेत्र असल्यामुळे शहरीकरणापासून मुक्त आहे. गोंगाटापासून दूर आणि चोहीकडे हिरवळ असल्याने इथे निवांत क्षण घालवायला एकदा तरी यायलाच हवे. जवळपास 17 किमी वर पसरलेल्या समुद्रकिनारी चालताना एका बाजूला खारफुटीची वने आणि दुसरीकडे अथांग समुद्र असे मोहक दृश्य पाहायला मिळते.

डहाणूजवळील बहरोट लेण्यांमध्ये स्थित देशातील एकमेव झोरोस्टेरियन गुहा मंदिर व हजारो वर्षांपासून तेवत असलेली इराण शाह ज्योत ही नक्की भेट द्यावी अशी ठिकाणे आहेत. रामायण मालिकेचे चित्रण झालेल्या उंबरगाव येथील प्रसिद्ध वृंदावन स्टुडिओला आपणही आवर्जून भेट द्यावी. सकाळी सूर्योदय आणि सायंकाळी सूर्यास्त पाहत आपण एक दिवसाची छोटी सहल पूर्ण करू शकता.