सविस्तर

राज्यातील मोजक्या पांढऱ्या वाळूच्या किनाऱ्यांपैकी एक असलेला गणपतीपुळे समुद्रकिनारा येथील 400 वर्ष जुन्या स्वयंभू गणपती मंदिरामुळे पर्यटक व भाविकांना आकर्षित करतो. दुतर्फ़ा हिरवीगर्द झाडी असणारे रस्ते, लाल माती आणि श्रीगणेशाचा वरदहस्त असणारे हे पर्यटनस्थळ अतिशय नयनरम्य व मनाला शांतता देणारे आहे. इतकेच नाही तर हे भारतातील मोजक्या अश्या मंदिरापैकी एक आहे जिथल्या दैवताचे मुख पश्चिमेकडे आहे आणि म्हणूनच इथल्या बाप्पाला पश्चिमेचा द्वारपालक म्हणूनही मानले जाते. सूर्योदय आणि सूर्यास्ताच्या वेळी सूर्याच्या किरणांनी जेव्हा येथील किनारा व मंदिर न्हाऊन निघते, तो एक क्षण आपल्याला निसर्गाची किमया पटवून देईल. मंदिरात जाऊन आपल्या मनाला शांती मिळताच त्याच्या अगदी उलट टोकाचा साहसी अनुभव घेण्यासाठी थेट समुद्रकिनारा गाठून आपण जेट स्कीइंग, स्पीड बोटिंग, एटीव्ही बाईकवरुन सफर असे चित्तथरारक खेळ खेळू शकाल.