सावित्री नदी जिथे अरबी समुद्राला मिळते त्या मुखावर हरिहरेश्वर हे गाव वसले आहे. महाराष्ट्रातील रमणीय शांत समुद्र किनाऱ्यांची यादी हरिहरेश्वर किनाऱ्याची गणना केल्याशिवाय पूर्णच होऊ शकत नाही . डोंगर रांगा आणि मंदिरांनी वेढलेला हा परिसर दक्षिण काशी म्हणून प्रसिद्ध आहे. असं म्हणतात की भगवान श्रीविष्णूंच्या पावन चरणांनी ही भूमी समृद्ध झाली आहे, ही जरी धार्मिक मान्यता असली तरी याठिकाणी भेट दिल्यावर एक अद्भुत शांती कोणालाही अनुभवता येईल, त्यामुळे खरोखरच निसर्गाचा या ठिकाणावर वरदहस्त आहे असे म्हणण्यात काहीच हरकत नाही. इथे फार साहसी खेळ नाहीत किंवा माणसांची गर्दीही नाही, स्वतःसोबत चार क्षण घालवू इच्छिताय? तर हा समुद्रकिनारा तुमची वाट पाहतोय!