हर्णे आणि मुरुड ही दोन टुमदार शहरे स्वच्छ व सुंदर समुद्रकिनाऱ्यांमुळे पर्यटकांचे आकर्षण ठरतात. हर्णे समुद्रकिनारा हा मच्छीमारांसाठी मोक्याचे ठिकाण आहे, येथे मासळी पकडून किनाऱ्यालगतच्या बाजारात तिचा लिलाव केला जातो, याठिकाणी खरेदीच्या निमित्ताने तशी बरीच गर्दी असते म्हणूनच आपल्याला जर एकांत अनुभवायचा असेल तर मुरुड समुद्रकिनारा आपल्यासाठी अधिक उत्तम ठरेल. याच कारणाने अनेक जलतरणपटू देखील येथे सरावासाठी येत असतात. 

हर्णे बंदरापाशीच सुवर्णदुर्ग व कनकदुर्ग हे समुद्रीकिल्ले मोठ्या दिमाखात उभे आहेत, मुरुडचे दुर्गादेवी मंदिर आणि आंजर्ले टेकडीवरील गणपती मंदिर भाविकांना खास आकर्षित करते. आंजर्ले या हाकेच्या अंतरावर असणाऱ्या समुद्रकिनारी एप्रिलमध्ये कासव महोत्सव आयोजित केला जातो, अंड्यातून बाहेर पडणाऱ्या ऑलिव्ह रिडले कासवांच्या समुद्राच्या दिशेने पडणारं पहिलं पाऊल पाहण्याचा हा अनुभव खरोखरच विलक्षण असतो.