सविस्तर

किहीम हे अलिबागच्या उत्तरेस स्थित गाव विलक्षण पार्श्वभूमी आणि स्वच्छ वातावरणासह हिरव्यागार आणि रंगीबेरंगी वन्य फुलांनी व त्यांच्या ओढीने येणाऱ्या नानाविध पक्ष्यांनी समृद्ध आहे. काळभैरव मंदिरात दर्शन व त्यानंतर किनारपट्टीवरील समुद्राच्या लाटांचा आनंद घेत एक छोटी सुट्टी आपण इथे नक्कीच आयोजित करू शकता. मोटारबाईकिंग, पॅराग्लाइडिंग, बनाना राईड असे साहसी खेळ येथे अलीकडेच खूप प्रसिद्ध झाले आहेत. या ठिकाणी वर्षभर निसर्ग प्रसन्नच असला तरी वर्षाअखेरीस म्हणजेच हिवाळ्यात येथे रंगीबेरंगी फुलपाखरांची जणू काही जत्राच भरते, हे सारे काही मुंबई पुण्याहून अगदी हाकेच्या अंतरावर आहे, त्यामुळे कामाच्या धबडग्यातून विश्रांती हवी तर थेट अलिबाग गाठा!