याठिकाणी काय पाहाल

नाशिकला भारताची वाईन राजधानी म्हणून ओळखले जाते हे आपल्याला माहिती असेलच पण तुम्हाला हे माहित आहे का की या शहराला एक प्राचीन इतिहास आहे, ज्याचे उल्लेख आपल्याला पुराणकाळात सापडतात. असे म्हटले जाते की भगवान राम यांनी वनवासाच्या काळात नाशिक क्षेत्री आपले निवासस्थान बनविले होते. याच ठिकाणी भगवान लक्ष्मणांनी शूर्पणकेचे नाक कापले आणि या पवित्र शहराला नाशिक हे नाव दिले. सयाद्री पर्वतरांगेत गोदावरी नदीच्या काठावर वसलेल्या नाशिकवर निसर्गाचा वरदहस्त आहे. एखाद्या धार्मिक स्थळाला भेट द्यायची, साहसाचा अनुभव घेत ट्रेकींग करायची किंवा द्राक्षांच्या बागांमध्ये निवांत फेरफटका मारायची इच्छा असेल तर भारताची वाईन राजधानी असलेल्या नाशिकमध्ये अनेक पर्यटन स्थळे तुमची प्रतिक्षा करत आहेत.

रिसॉर्टची वैशिष्ट्य

कल्पना करा, सकाळी उठल्यानंतर तुम्ही बाल्कनीत येता आणि आपल्या डोळ्यासमोर अथांग पाणी आणि हिरवागार परिसर आपल्याला दिसतो. गंगापूर धरणाच्या काठावर असलेल्या एमटीडीसी ग्रेप पार्क रिसॉर्ट आपल्याला असाच विलक्षण अनुभव देईल. रिसॉर्टच्या बाजूला अनेक प्रेक्षणीय स्थळे आहेत ज्या पैकी एक म्हणजे फक्त पाच मिनिटांच्या अंतरावर असलेला बोट क्लब. सामुहिक कार्यक्रम वा लग्नकार्य साजरा करायचा असल्यास जास्त लोकांची सोय होईल अशाप्रकारच्या खोल्या, सभागृह, लॉंन आणि जेवण्याच्या सोईसाठी वायोलेट उपहारगृह उपलब्ध आहे. विश्रांती घेत, मनातला थकवा दूर करत एक आनंदी वेळ घालवण्यासाठी या रिसॉर्टला नक्की भेट द्या.