याठिकाणी काय पाहाल

पश्चिम घाटावरील सयाद्री पर्वतांच्या कुशीत वसलेल्या माथेरानची सफर तुम्हाला निसर्गाच्या जवळ घेऊन जाते यात काही शंका नाही. 2600 फूट उंचीवर, मुंबईपासून अवघ्या 100 किलोमीटरवर हे थंड हवेचं पर्यटन आकर्षण स्थित आहे. माथेरान या शब्दाचा अर्थच मुळात माथ्यावरील रान असा होतो ज्यावरून तुम्ही येथील हिरवळीचा अंदाज घेऊच शकता. वाहनांना परवानगी नसलेल्या या पर्यटन स्थळी प्रवेश करताच आपल्याला प्रदूषणमुक्त वातावरणाची अनुभूती होईल.

लाल मातीचे रस्ते, सभोवताली हिरव्यागार टेकड्या, प्रदूषणाविरहीत गार वारा यामुळे पर्यटक वर्षभर माथेरानला गर्दी करतात. माथेरान मध्ये घोडेस्वारी, पायवाटांवरून निवांत भटकंती आणि सूर्योदय-सूर्यास्त पॉईंट्सना भेट दिल्याशिवाय ही सफर पूर्णच होऊ शकत नाही.

रिसॉर्टची वैशिष्ट्य

माथेरानच्या पायथ्याशी दस्तुरी नाक्याजवळ वसलेले एमटीडीसी रिसॉर्ट हे प्रसिद्ध टॉय ट्रेन स्थानकापासून 2.5 किमी अंतरावर आहे. सर्व सुख सुविधांनी समृद्ध असलेल्या आमच्या रिसॉर्ट मध्ये येऊन तुम्ही निश्चिन्तपणे तुमच्या माथेरान मधील सुट्टीचा आनंद घेऊ शकता. निसर्गाच्या कुशीत वसलेला हे रिसॉर्ट म्हणजे शहरातील गर्दी आणि सिमेंटच्या जंगलापासून काही काळ दुर जाऊन एखाद्या सुंदर परिसरातील शांतता अनुभवण्याची उत्तम सोय म्हणता येईल.