याठिकाणी काय पाहाल

जर समुद्रकिनाऱ्यावर एका मस्त सुट्टीचा आनंद लुटायचा विचार करताच 'क्वीन बीच ऑफ कोकण' अशी ओळख असलेला तारकर्ली हा पर्याय प्रत्येकाच्या डोक्यात येतोच. हा समुद्रकिनारा स्वच्छ व येथील पाणी इतके नितळ आहे की आपण पाण्याखालील निदान 20 फूट खोल नजारा सहज पाहू शकाल. सूर्यास्ताच्या लालकेशरी उन्हात चमचमत्या रुपेरी वाळूवर नुसतं चालणं हा सुद्धा एक सुखद अनुभव ठरतो, आणि जर का आपल्याला काहीतरी साहसी करण्याची इच्छा असेल तर स्कुबा डायव्हिंग, स्नोर्कलिंग आणि पॅरासेलिंग सारख्या साहसी जलक्रीडांचे पर्याय आपल्याला अगदी कमी खर्चात इथे उपलब्ध होतील. आता राहिला प्रश्न पोटपूजेचा तर मालवणात आलात आणि मासोळीच्या कालवणावर ताव मारला नाहीत असं होऊ तरी शकेल का? तारकर्ली मध्ये जागोजागी अस्सल मालवणी खानावळी व उपहारगृह आहेत. कारवणे वाडी या खानावळीत तर पर्यटकांच्या रांगा लागतात, आपणही हा अनुभव चुकवू नका. वेळ असल्यास तारकर्लीहुन पुढे छत्रपती शिवाजी महाराजांनी सतराव्या शतकात बांधलेल्या सिंधुदुर्ग किल्ल्याला सुद्धा आपण भेट देऊ शकता.

रिसॉर्टची वैशिष्ट्य

समुद्रकिनारी स्थित तारकर्ली येथील एमटीडीसी रिसॉर्टमध्ये केवळ समुद्राचा नजारा नाही तर इतर अनेक सुखसोई आपल्यासाठी उपलब्ध आहेत. रुपेरी वाळूत, किनाऱ्याजवळ बांधलेल्या कुटीमध्ये बसून तुम्ही थंडगार वाऱ्याच्या झुळूकांचा आनंद घेत विश्रांती घेऊ शकता. डोक्यावर निळं आकाश आणि पायाखाली निळाशार समुद्र या सुंदर वातावरणाला अधिकच साज चढवणारा , एक खाजगी स्विमिंग पूल देखील या रिसॉर्ट मध्ये आहे. रिसॉर्ट मध्ये असलेल्या कोरल उपहारगृहात आपल्याला कोकणी मेजवानीचा आस्वाद घेता येईल.