याठिकाणी काय पाहाल?

अरबी समुद्र किनाऱ्याला लागून असलेल्या वेळणेश्वर या गावात आपल्याला अनेक सुंदर समुद्र किनारे पाहायला मिळतील जे आजही पर्यटकांच्या नजरेआड आहेत. वेळणेश्वर ला भेट देऊन तुम्ही इथले मऊसुत वाळूचे समुद्रकिनारे, नारळाच्या बागा बघू शकता. वेळणेश्वर बघताना जागोजागी इतिहासाची साद आपल्याला ऐकू येईल. जुन्या काळातील दगडी बांधिव मंदिरे, 400 वर्षापुर्वी बांधण्यात आलेले शिव मंदिर आपल्याला वेळणेश्वरचे पौराणिक माहात्म्य पटवून देतात. गावापासून काही अंतरावरच जयगड किल्ला आहे ज्यावर आपल्याला 16 व्या शतकात पाण्यात बांधलेली तटबंदी पाहायला मिळेल आणि सोबतच 1932 साली ब्रिटिशांनी बांधलेल्या दिपगृहाला भेट देऊन आपण निसर्गाचा अद्भुत नजारा अनुभवू शकाल.

रिसॉर्टची वैशिष्ट्य

जर तुम्ही वेळणेश्वरला भेट देणार असाल, तर अगदी आपलं घरच वाटेल अशा उबदार विश्रामगृहांमध्ये राहायला तुम्हाला नक्की आवडेल. लुसलुशीत हिरवळीवर वसलेल्या या विश्रामगृहापासून चंद्रकोर आकाराचा वेळणेश्वर समुद्रकिनारा आणि प्रसिद्ध वेळणेश्वर मंदिर अगदी हाकेच्या अंतरावर आहेत. इतिहासप्रेमींसाठी येथून 26 किलोमीटर वर विशाल जयगड किल्ला आहे. पर्यटक संकूलामध्ये असणाऱ्या अरुणी उपहारगृह व्यतिरिक्त आजूबाजूच्या परिसरात सुद्धा तुम्हाला अस्सल कोकणी जेवणाचा आस्वाद घेता येईल. समुद्र व सूर्योदयाचे अद्भुत दृश्य बघत इथल्या प्रशस्त खोलींमध्ये आपणास आराम करायला नक्कीच आवडेल.